Saturday, February 9, 2013
ဇွဲ (အတွေး အမြင် ပုံပြင်)
လက်ဖက်ရည်ဆိုင်မှာ သူငယ်ချင်းတွေ ဆုံသလောက်ရှိပြီ၊ ပုံပြင်ဝါသနာရှင် ရွှီး တစ်ယောက်သာ မရောက်သေးတာ။
သူငယ်ချင်းတွေ ကိုယ်နှစ်သက်ရာ မုန့်နဲ့ လက်ဖက်ရည်၊ ကော်ဖီတွေ မှာစားကြတာ.. တစ်ဝက်လောက်ကျိုးမှ ရွှီး တစ်ယောက် ပျာယီးပျာယာ ရောက်လာတယ်။
" ဒီနေ့တော့ အေးအေးဆေးဆေးစားကြပါ၊ အင်တာနက် ကော်နက်ရှင်တွေ ကျနေလို့ ရွှီး ပုံမပြောနိုင်ဘူး " လို့ မဲတူကပြောပါတယ်။
ရွှီး ကတော့ သူမှာစားနေကျ ပဲထမင်းကိုစားရင်း ခပ်ပြုံးပြုံးပါ။
"မင်းတို့ကို ငါဖတ်ခဲ့တဲ့ စာအုပ်ထဲက ပုံပြင်တစ်ပုဒ်ပြောမယ်၊ ဆရာကြီးရွှေဥဒေါင်းရေးတဲ့ အကြံဉာဏ်ဖြင့်ကြီးပွားရေးစာအုပ် စကားချီးမှာပါတဲ့ အကြောင်းအရာ"
"အင်တာနက်ထဲက ပြောစရာ မရှိတော့ဘူးလား"
"ပုံပြင်တွေ အများကြီးရှိတယ်၊ Download လုပ်ထားတာရှိတယ်၊ ဒါပေမဲ့ ဒီပုံပြင်ကို အရင်ပြောချင်လို့"
"ပြောစေ"
“အသက်အာမခံကုမ္ပဏီတစ်ခုမှာ အလုပ်လုပ်တဲ့ ကိုယ်စားလှယ်တစ်ယောက်ဟာ စက်ပိုင်တစ်ဦးဖြစ်တဲ့ ဦးလေးဆီ အလည်အပတ်သွားရင်း ဦးလေးရဲ့အလုပ်ခန်းအတွင်းမှာ အတူတကွ ထိုင်နေကြသတဲ့။ အဲဒီအချိန်မှာ အလုပ်သမားတစ်ယောက်ရဲ့ သမီးလေးတစ်ယောက်ဟာ အခန်းထဲကိုဖြည်းညင်းစွာဝင်လာပြီး စားပွဲအနီးမှာ တိတ်ဆိတ်စွာရပ်နေတယ်။ ဦးလေးက သူ့ကိုမြင်တော့.. ဟေ့ ဘာလာရှုပ်တာလဲ လို့ ငေါက်ငမ်းပြီး မေးလိုက်တယ်။ မိန်းကလေးက စက်ပိုင်ရဲ့မျက်နှာကို စေ့စေ့ကြည့်ပြီး အမေက ပိုက်ဆံငါးမူး ပေးလိုက်ပါတဲ့ လို့ပြောသတဲ့ "
" ......... "
"စက်ပိုင်က ဟေ့ လာမရှုပ်နဲ့၊ ပြန်သွား လို့ ဆိုတော့ သူငယ်မ က ဟုတ်ကဲ့ရှင့် လို့ ပြောပေမဲ့ နေရာက မရွှေ့ဘဲ ရပ်မြဲရပ်နေတယ်တဲ့"
"ခပ်ပေပေထဲကနဲ့တူတယ်ထင်တယ်"
"စက်ပိုင်က သူငယ်မကို ဂရုမစိုက်တော့ ဘဲ သူ့အလုပ်သူ ဆက်လုပ်နေပြီး... အတန်ကြာလို့ ခေါင်းထောင်ကြည့်လိုက်တဲ့အခါ အဲဒီနေရာမှာ ရပ်မြဲရပ်နေတဲ့ မိန်းကလေးကိုမြင်တော့ မျက်လုံးပြူးသွားပြီး ဟဲ့.ကောင်မလေး သွားဆိုတာ မသွားသေးဘူးလား ပြောတယ်၊ သူငယ်မလေးကတော့ အမေက ပိုက်ဆံငါးမူးပေးလိုက်ပါတဲ့လို့သာ ထပ်ပြောတယ်၊ စက်ပိုင်က ဘယ်က ပိုက်ဆံငါးမူးပေးရမှာလဲ၊ မပေးဘူး၊ ငါရိုက်လွှတ်လိုက်ရမလား ဆိုတော့ ဟုတ်ကဲ့ရှင့် လို့ပြောပေမဲ့ နေရာကမရွှေ့ဘူး၊ အာမခံကိုယ်စားလှယ် တူ ကလဲ ထိုင်ပြီးအကဲခတ် နေတယ်"
"ဇွဲကောင်းတယ်နော်"
"အတန်ကြာတော့ စက်ပိုင်က ဟေ့ ဘယ့်နှယ်ကောင်မလေးလဲ၊ သွားဆိုတာ မသွားသေးဘူးလာ၊ ငါပြောတာမကြားဘူးလား ဆိုတော့ ကြားတယ်ရှင့် တဲ့၊ ကြားရင် ဘာလို့မသွားသေးသလဲ မေးတော့ ပိုက်ဆံငါးမူးမရသေးလို့ရှင့်လို့ပြန်ပြောတယ် "
"သတ္တိကောင်းတာပဲ"
"စက်ပိုင်က သယ် ခက်တဲ့ကောင်မလေးပါလား၊ ငါရိုက်လွှတ်ရမလား လို့ပြောပြီး ထိုင်ရာကထမယ်လုပ်တော့လဲ သူငယ်မလေးက မလှုပ်ရှားဘဲ ရပ်မြဲရပ်နေတာပဲတဲ့၊ စက်ပိုင်က ကောင်မလေးမသွားသေးဘူးလား ဆိုတော့ ပိုက်ဆံငါးမူးမရသေးဘူးရှင့် လို့ပဲ ပြန်ပြောတယ်"
" ကောင်မလေးကိုလေးစားသွားပြီ "
"စက်ပိုင်က ဒီလောက်ပေတဲ့ကောင်မလေး၊ နင် သေပေတော့ လို့ပြောပြီး ထိုင်ရာကထ၊ လမ်းလျှောက်တုတ်ကောက်ကိုယူပြီး သူငယ်မအနီးကို ချဉ်းကပ်သွားတယ်၊ အာမခံကိုယ်စားလှယ်က ခက်ထန်ကြမ်းကြုတ်တဲ့ စိတ်သဘောထားရှိသူ သူ့ဦးလေးရဲ့အကြောင်းကို သိပြီးသားမို့ ဘုရားတရင်း ခက်ချေတော့မှာပဲလို့ ငေးကြည့်နေမိတယ်၊ သူငယ်မလေးက မျက်လုံးပြူးမျက်ဆံပြူးနဲ့ တုတ်ကိုကိုင်ပြီး သူ့ဆီလာတဲ့စက်ပိုင်ကြီးကို ကြောက်လန့်ဟန်မရှိတဲ့အပြင် ရှေ့ကိုပင်တစ်လှမ်းတိုးပြီး ဦးခေါင်းကိုမော့ကြည့်ကာ အမေက ပိုက်ဆံငါးမူးပေးလိုက်ပါတဲ့ လို့ အသံကုန်ဟစ်ပြီး အော်ပြောလိုက်တယ်"
"အာဂသတ္တိခဲပဲကွ"
"အဲဒီအချိန်မှာ စက်ပိုင်ကြီးဟာ ရင်ဘတ်ကို လက်သီးနဲ့အထိုးခံလိုက်ရသလို မြှောက်ထားတဲ့တုတ်ကို ပြန်ချပြီး ရုတ်တရက်ရပ်တန့်ပြီးကြည့်တော့ တူဖြစ်သူအာမခံ ကိုယ်စားလှယ်လဲ အလွန်အံ့သြပြီး ကြောင်တောင် ငေးကြည့်နေတယ် "
"စိတ် စိတ်ချင်းပြိုင်ပွဲပဲ"
"စက်ပိုင်ကြီးက ရိုက်မယ်လို့ရွယ်ထားတဲ့တုတ်ကောက်ကိုချရင်း ခက်ထန်တဲ့ မျက်နှာထားလဲ တဖြည်းဖြည်း ပျောက်သွားကာ အိတ်ထဲမှာ လက်နှိုက်ပြီး ငါးမူးစေ့ကို သူငယ်မလေးကို ပေးလိုက်တယ်။ သူငယ်မလေးလဲ ငါးမူးစေ့ကို လှမ်းယူပြီး စက်ပိုင်ကြီးကို စေ့စေ့ကြည့်ကာ အခန်းထဲက လှည့်ထွက်သွားသတဲ့"
"..............."
"သူငယ်မထွက်သွားပြီးနောက်တော့ စက်ပိုင်ကြီးဟာ ပြူတင်းပေါက်က အပြင်ကိုငေးကြည့်နေတာ ၁၀မိနစ်လောက်ကြာတယ်၊ စက်ပိုင်ကြီးဟာ ခက်ထန်တဲ့အမူအရာရှိသူတစ်ယောက်ဖြစ်လို့ အလုပ်သမားတွေက အနီးကိုချဉ်းကပ်ဖို့ မ၀ံ့ကြဘူး၊ အလုပ်သမားတစ်ယောက်ရဲ့ ၁၀နှစ်အရွယ်သမီးငယ်က စိတ်ကိုစိတ်ချင်း နှိမ်နှင်းသွားတာကို အံ့ကြတွေးတောနေတာလို့ တူဖြစ်သူက အကဲခတ်မိတယ် "
"စဉ်းစားစရာတွေကတော့ အများကြီးပဲ"
"ကူလီတစ်ယောက်ရဲ့သမီးဖြစ်တဲ့ မိန်းကလေးတစ်ယောက်က ခက်ထန်တင်းမာတဲ့ စိတ်သဘောရှိတဲ့ စက်ပိုင်ကြီးတစ်ယောက်လုံးကို အောင်မြင်ပြီးနှိမ်နှင်းလိုက်တာ ဘာကြောင့်လဲ၊ တင်းမာတဲ့လူကြီးဟာ သူငယ်မလေးရှေ့မှောက်မှာ ဘာကြောင့် ပျော့ပျောင်းသွားပြီး သူငယ်မလေးရဲ့ အလိုကိုလိုက်ရသလဲ၊ သူငယ်မလေးမှာ ဘယ်လိုတန်ခိုးသတ္တိထူးရှိသလဲ ဆိုတဲ့ မေးခွန်းပုစ္ဆာတွေကို တူဝရီးနှစ်ယောက်လုံး မိမိကိုယ်ကို မိမိမေးမြန်းမိကြတယ်"
"အဖြေကဘာလဲ"
"တူဖြစ်သူအသက်အာမခံ ကိုယ်စားလှယ်က အဖြေကိုတွေ့ခဲ့တယ်၊ အဖြေကိုတွေ့တဲ့နေ့ကစပြီး သူဟာ အသက်အာမခံပေါ်လစီတွေကို အတွင်ကျယ်ဆုံး ရောင်းချနိုင်တဲ့ ကိုယ်စားလှယ်တစ်ဦးအဖြစ်ကို ရောက်သွားပြီး သူ့လစဉ်ကြေးကော်မရှင်က ၀န်ထောက် ၁၀ ယောက်ရဲ့လခထက်များတယ်တဲ့"
"ငါလဲအဖြေသိချင်တယ်"
"အဖြေသိချင်ရင် စဉ်းစားဉာဏ်ထုတ်ပေ့ါကွာ"
ဖေလင်းသစ်
Subscribe to:
Post Comments (Atom)
No comments:
Post a Comment