"သူ .. ပြန်လာတော့မှာပါ"
စာရေးသူကိုလှမ်းပြောရင်းသခင်တင်မြတစ်ယောက်ပြတင်းပေါက်ကနေဇနီးသည်ရုံးကပြန်လာနေကျ လမ်းထိပ်ဘက်ဆီလှမ်းမျှော်ကြည်လိုက်ပါတယ်။
"နောက်တစ်နေ့စာအတွက်ပါ၊တစ်ခါတည်းဈေးဝင်ဝယ်တတ်တော့တစ်ခါတလေ နည်းနည်းတော့နောက်ကျတတ်တယ်" အားနာဟန်နဲ့နောက်တစ်ကြိမ်စကားဆိုတဲ့အခါမှာတော့
သူ့လေသံထဲမှာအပြန်နောက်ကျတဲ့ဇနီးသည်ကို၊စိုးရိမ်နေဟန်ခပ်ပါးပါးလွှမ်းလို့။
တို့ဗမာအစည်းအရုံးအဖွဲ့ဝင်သခင်တင်မြဟာပထမဇနီးဆုံးပါးသွားပြီးတဲ့နောက်ဒုတိယအိမ်ထောင်ကို ပြီးခဲ့တဲ့၂၀၀၈ခုနှစ်၊သူ့အသက် ၈၄ နှစ်မှာထူထောင်ခဲ့ပါတယ်။အိမ်သူသက်ထားအသစ်ကတော့ ခုသူစောင့်မျှော်နေတဲ့အသက် ၄၃ အရွယ်ဒေါ်သန်းသန်းညွန့်ပဲဖြစ်ပါတယ်။
"ဒီအရွယ်မှာချစ်တာ၊မြတ်နိုးတာတွေကိုဘေးဖယ်ပြီးတိုင်ပင်ဖော်တိုင်ပင်ဖက်၊ဆေးပေးမီးယူဆိုတဲ့သဘောနဲ့ အိမ်ထောင်ပြုခဲ့တာပါ"လို့ လေး လေးနက်နက်ဆိုတဲ့သခင်တင်မြကပထမအိမ်သူနဲ့၆၃နှစ်ကြာပေါင်းသင်း ခဲ့ပါတယ်။အိမ်ထောင်ရှင်မဟာအရိုးဝါရောဂါနဲ့အိပ်ရာထဲမှာ၁၃နှစ်ကြာလဲနေခဲ့ရပြီးလွန်ခဲ့တဲ့လေးနှစ်က ကွယ်လွန်ခဲ့တယ်လို့သိရတယ်။"သားသမီးတွေလည်းတစ်ယောက်မှမရှိကြတော့ဘူးလေ။ အကုန်ဆုံးကုန်ကြပြီ။ချွေးမတစ်ယောက်ရှိပေမယ့်သူကလည်းကိုယ်နောက်အိမ်ထောင်ပြုတဲ့အပေါ်
ဘာမှမပြောပါဘူး" လို့သခင်တင်မြကပြောပါတယ်။
"တစ်ယောက်တည်း နေလို့မရဘူးလားဆိုတော့ရပါတယ်။ဒါပေမယ့်ကိုယ့်ကိုဂရုစိုက်မယ့်သူ ကိုယ်ပြောတဲ့စကားတွေကို သေသေ ချာချာနားစိုက်ထောင်ပေးမယ့်သူကိုယ့်ကိုအားကိုးမယ့်သူ ကိုယ်ကလည်းအားကိုးရမယ့်သူတော့ရှိသင့်တယ်လို့ထင်တယ်"လို့သခင်တင်မြက၊တွေးတွေးဆဆဆိုတယ်။
"အခုတော့ နောက်အိမ်ထောင်ပြုလိုက်တာပဲကောင်းတယ်လို့ပြောရမလားမသိဘူး။ အရင်ကထက်စာရင်နေလို့ပျော်လာတယ်။အချိန်မှန်မှန်ဆေးသောက်ဖြစ်လာတယ်။ ထမင်းစားဖြစ်လာတယ်။"အဲဒီအချိန်မှာပဲခြံဝင်းထဲဝင်လာတဲ့အိမ်သူသက်ထားကိုမြင်လိုက်တာမို့ အပြုံးလေးသန်းရင်း"ဟော..ပြန်လာပါပြီ"လို့ဆိုတယ်။
ဒေါ်သန်းသန်းညွန့်ဟာပထမခင်ပွန်းဆုံးပါးပြီးနှစ်နှစ်အကြာမှာခုလိုသခင်တင်မြနဲ့လက်တွဲခဲ့တာပါ။
"အန်တီအတွက်ကတော့အခုလိုအိမ်ထောင်ပြုခဲ့တဲ့အတွက်နောင်တရတယ်ဆိုတာတစ်ခါမှ မတွေးဖူးပါဘူး"လို့အစချီရင်း"အန်တီအနေအထားနဲ့တခြားသူတစ်ယောက်ကိုလက်ထပ်တာထက်စာရင် ဘဘလိုလေးစားစရာကောင်းတဲ့ပုဂ္ဂိုလ်ကိုရွေးချယ်ခဲ့တာအကောင်းဆုံးပါပဲ"လို့ပြောပါတယ်။
ဒါကြောင့်သူတို့အိမ်ထောင်ရေးမှာငယ်ရွယ်သူအချင်းချင်းဆိုတွေ့ရနိုင်တဲ့ကတောက်ကဆဖြစ်တာမျိုး၊ အကြိုက်မတူတာမျိုးမရှိဘူးလို့လည်းဆိုလေရဲ့။
"ဘဘကအသက်ကြီးသူဖြစ်တော့ဒေါသလည်းမကြီးဘူး။ခွင့်လွှတ်နိုင်တယ်။ ကိုယ့်အပေါ်နားလည်မှုရှိတယ်လို့ပြောလို့ရတာပေါ့ နော်။ကိုယ့်အတွက်ကလည်း မိဘနေရာမှာရော၊ကျွေးမွေးထားတဲ့ကျေးဇူးရှင်အဖြစ်ရောသတ်မှတ်ထားပါတယ်" လို့ဒေါ်သန်းသန်းညွှန့်က ကြည်ကြည်နူးနူးဆိုပါတယ်။ဘ၀ရဲ့နောက်ဆုံးအချိန်တွေကိုအတူတူဖြတ်ကျော်မယ်ဆိုပြီးလက်တွဲခဲ့တဲ့ စုံတွဲကတော့စာရေးဆရာညီညီနိုင်နဲ့စာရေးဆရာမသက်ထားခင်(ဒေါ်သီရိ)တို့ပါပဲ။
"သားသမီးတွေနဲ့နေခဲ့ပေမယ့်ကိုယ်ဖြစ်ချင်တာကို သိပ်နားမလည်ကြဘူး။နေမကောင်းရင်လည်းဆေးတိုက်၊ဆေး ခန်းပို့ပေးမယ့်၊ကိုယ်ပြောချင်တဲ့ စကားတွေကိုဂရုတစိုက်နားထောင်ပေးမယ့်သူမရှိဘူး"လို့ဆိုတဲ့အသက် ၆၄ နှစ်အရွယ်ဦးညီညီနိုင်ဟာ ပထမအိမ်ထောင်ဆုံးပါးပြီးရှစ်နှစ်အကြာမှာစိတ်တူကိုယ်တူဝါသနာတူတဲ့စာရေးဆရာမသက်ထားခင်နဲ့ ပြီးခဲ့တဲ့မေလကအိမ်ထောင်သစ်ထူထောင်ခဲ့ပါတယ်။"လက်မထပ်ဘဲသူငယ်ချင်းမိတ်ဆွေတွေလို
နေလို့ရပေမယ့်တိုးတိုးဖော်ဆိုတာကိုယ့်အိမ်ထောင်ဖက်အချင်းချင်းမှဖြစ်မှာမို့လို့လက်ထပ်ဖြစ်ခဲ့တယ်။"
ဒီလိုလက်ထက်လိုက်ခြင်းဟာသူ့အသွင်အပြင်ကိုပိုပြီးသပ်သပ်ရပ်ရပ် ဖြစ်လာစေသလိုသူပြောချင်တဲ့ စကားတွေကိုလည်းဂရုစိုက်နားထောင်ပေးမယ့်သူရှိလာတာမို့စိတ်ချမ်းသာရပြီးအရင်ကခံစားခဲ့ရတဲ့ စိတ်အားငယ်တာမျိုးတွေလည်းမရှိတော့ဘူးဆိုပဲ။
ခင်ပွန်းသည်စကားပြောနေတာကိုဘေးကနေထိုင်ပြီးနားထောင်နေတဲ့ဒေါ်သီရိကလည်း "အခုချိန်အထိတော့စိတ်အခန့်မသင့်တာ၊အကြိုက်မတူတာတို့မကြုံရသေးပါဘူး။တကယ်လို့ကြုံ လာရင်လည်းငယ်သူတွေမဟုတ်တော့နားလည်နိုင်မှာပါ"လို့ပြောပါတယ်။
ဟိုးအရင်ကတည်းကတစ်ယောက်နဲ့တစ်ယောက်သိနှင့်ပြီးသားဖြစ်တဲ့သူတို့နှစ်ယောက်ဟာ အခုချိန်မှာတော့အတွဲညီညီနဲ့သူတို့ချစ်တဲ့စာပေလမ်းမှာလျှောက်လှမ်းနေကြပါတယ်တဲ့။
"အန်တီတို့ကဘ၀အတွက်ဘုရားစင်နဲ့စာပေကြားမှာပဲနေထိုင်သွားကြတော့မှာဆိုတော့
အေးအေးချမ်းချမ်းလေးနဲ့တိုင်ပင်ဖော်၊အားပေးဖော်၊ကိုယ့်ကိုနားလည်ပေးမယ့်သူကိုပဲရွေးချယ်တာပါ"လို့ သူနောက်အိမ်ထောင်ထူဖြစ်ပုံကိုပြောပါတယ်။
ဒီလိုအသက်ရမှနောက်ထပ်အိမ်ထောင်ပြုကြတဲ့အပေါ်ကိုစိတ်ပညာပါမောက္ခ၊ဌာနမှူး၊
ဒေါက်တာအောင်မြတ်ကျော်ကလူတွေဟာအိမ်ထောင်ကွဲလို့ပဲဖြစ်ဖြစ်၊အိမ်ထောင်ဖက်ဆုံးပါးလို့ပဲဖြစ်ဖြစ်၊ အဲလိုမှမဟုတ်လူပျိုကြီး၊အပျိုကြီးအဖြစ်သီးသန့်နေခဲ့လို့ပဲဖြစ်ဖြစ်အသက်ကြီးလာတဲ့အခါမှာ အထီးကျန်မှုတွေခံစားရတတ်တာကြောင့်လို့သုံးသပ်ပြောပြပါတယ်။ဒါပေမယ့်အသက်ကြီးမှနောက် တစ်ကြိမ်လက်ထပ်သူရာခိုင်နှုန်းကအသက်ငယ်စဉ်လက်ထပ်တဲ့နှုန်းထက်နည်းပါးပါတယ်တဲ့။
"အနောက်နိုင်ငံတွေကနေကူးစက်လာတဲ့ယဉ်ကျေးမှုသဘောတော့မဟုတ်ပါဘူး။ဩဇာညောင်းတဲ့သူ၊ သားသမီးတွေအပေါ်မမှီခိုရတဲ့သူ၊စိတ်ဓာတ်ခိုင်မာတဲ့သူတွေဆိုရင်တော့အသက်ကြီးလည်းလက်ထပ်ချင် လက်ထပ်ကြတာပါပဲ။အဲဒီအတွက်ကိုယ့်ဘာသာရေး၊လူမှုရေးမှာထိခိုက်သွားတာမှမဟုတ်တာ။"
ဒေါက်တာကစိတ်ပညာပိုင်းဆိုင်ရာအရလူတိုင်းဟာကိုယ်ပြောတဲ့စကား၊အတွေ့အကြုံတွေကို ဂရုတစိုက်နဲ့နားထောင်ပေးမယ့်သူမျိုးလိုချင်တတ်ကြပြီးအသက်ကြီးမှအိမ်ထောင်ပြုကြသူတွေဟာ လိင်မှုကိစ္စ၊အိမ်ထောင်ရေးကိစ္စတွေထက်ကိုယ့်အပေါ်နားလည်ပေးမယ့်သူကိုသာရွေးချယ်လေ့ရှိကြ တယ်လို့လည်းရှင်းပြပါတယ်။"အိမ်ထောင်ဖက်ရွေးချယ်တဲ့နေရာမှာကိုယ့်ထက်ပညာရေး၊အသိပညာ နိမ့်ကျသူဖြစ်နေပေမယ့်ကိုယ့်ကိုအားပေး၊ဂရုစိုက်နိုင်တဲ့သူကိုရွေးချယ်ကြတယ်"လို့ဆိုသလို
ပျမ်းမျှအားဖြင့်အမျိုးသားတွေကအမျိုးသမီးတွေထက်စိတ်ဓာတ်ပိုပျော့ညံ့ကြပြီးနောက်အိမ်ထောင်ပြုကြသူ အများစုမှာလည်းအမျိုးသားတွေပဲဖြစ်ကြတယ်တဲ့။
"ယောက်ျားလေးတွေကငယ်ငယ်လေးထဲကအမေကိုအရမ်းချစ်တာတို့၊မိသားစုကိုခင်တွယ်တာတို့ ပိုများတယ်။မိန်းမတစ်ယောက်အတွက်သူ့အိမ်ထောင်ဖက်မရှိတော့တဲ့အခါမှာ ဘာမှသိပ်မဖြစ်ပေမယ့်ယောက်ျားတစ်ယောက်အတွက်တော့မိုးလင်းထဲကထမင်းစားလို့မရတာတို့၊ ရုံးကပြန်လာရင်လည်းဘာလုပ်လို့ဘာကိုင်ရမှန်းမသိတော့တာတို့ဖြစ်တတ်တယ်။၊ ဆရာကိုယ်တိုင်ရောပဲလေ"လို့မိန်းမနဲ့ယောက်ျားမှီခိုမှု၊ခံစားချက်ချင်းမတူတဲ့အပေါ်ကို သုံးသပ်ပြပြန်ပါတယ်။အသက်အရွယ်ရမှနောက်အိမ်ထောင်ထပ်ပြုခြင်းမှာကောင်းကျိုးတွေရှိသလို
သင့်တော်တဲ့ရွေးချယ်မှုမဖြစ်တဲ့အခါအသက်ငယ်သူတွေထက်ဒုက္ခပိုများစေတယ်လို့လည်းဆရာက ဆိုပါသေးတယ်။"သာမန်အိမ်ထောင်တွေမှာရည်းစားဘ၀၊ဒါမှမဟုတ် အချိန်ကာလတစ်ခုလောက်ယူပြီးတော့မှမတူညီတဲ့အရာတွေတွေ့လာရတယ်။ ဒါပေမယ့်အသက်ကြီးမှထပ်ပြုတဲ့အိမ်ထောင်တွေကမတူညီတာတွေကိုချက်ချင်းတွေ့ရတယ်။အဲဒီတော့ မှန်းထားတာတွေနဲ့မကိုက်ညီတဲ့အခါစိတ်ချမ်းသာမှုမရနိုင်ဘူး။အသက်အရွယ်နဲ့ခံနိုင်ရည်ကလည်း သိပ်မရှိတော့အန္တရာယ်ရှိနိုင်တယ်။" လို့ဒေါက်တာအောင်မြတ်ကျော်ကပြောပါတယ်။
ငြိမ်းအိအိထွေး
အတွဲအမှတ် (၂၄ ၊ အမှတ် ၄၈၀)
No comments:
Post a Comment